تاج واجب الرد

اولا كل عام وانتم بخير وعيد سعيد عليكم كلكم
والله اسال ان يتقبل منا الصيام والقيام
وان يهدينا الى الحق والى طريقه المستقيم
................
ثانيا فانه قد جاءنى تاج من اختنا فى الله
صاحبة مدونة اجمل ايامنا جزاها الله كل خير
بس طبعا انا اتاخرت فى الرد عليه
بس انا وعدتها انى ارد فى اقرب فرصه
وارجو ان تكون اجاباتى خفيفه عليكم وعلى كمان
...........................


-- الحالة الجسمانية بمعنى هل سيادتك تتمتع بصحة جيدة ولا الاخ صاحب مرض ؟

الحمد لله فانا بفضل الله بصحه جيدة
ربنا يديمها علينا ونحسن استغلالها
طبعا ده ما يمنعش الحاجات البسيطة اللى انتم عارفينها
برد وكحه وكده يعنى


-الحاله الاجتماعية بمعنى هل علاقتك بمن حولك جيدة
ولا عامل مشاكل مع طوب الارض ؟

الحمد لله يمكن دى اجمل حاجه فيا بجد
انا علاقتى مع الناس كويسه جدا
ودى اكيد نعمه كبيره من ربنا
طبعا مش كل الناس


الحاله العقلية بمعنى هل تشعر ان عقلك يعمل ولا حضرتك منيم دماغك ؟

والله مش كل الاوقات
سعات دماغى بيشتغل شغل جامد وسعات نايم خالص
مثلا انا فى الدراسه بقرا كتب كتير بجانب الكليه
بيتهيالى ان الاجازة هخلص فيها كل الكتب
واقعد افكر اجيب كتب جديده او اشوف حد اخد منه كتب
واجى اخر الدراسه واشترى شويه كتب
وسبحان الله ما اقرأهاش الا فى السنه الجديده


-الحاله العاطفية مش محتاجة تفسير ومش عايز استعباط ؟

ههههههههه حلوة مش عايز استعباط
هو طبعا انا اعزب
وطبعا قدامى مشوار طويل على ما افكر في حاجه زى دى
بس ده ما يمنعش ان الواحد يكون عنده امل
بيقولو هيرفعو المرتب
والله ربنا يسهل ونلاقى بنت الحلال وانا مش هتاخر
الشقة مش جاهزة والوظيفة مضمونه 280 جنيه يعنى حاجه تمام خالص


-الحاله الروحية بمعنى هل علاقتك بربنا كويسة ولا الكلام على ابو لهب ؟

هو برده ساعات ساعات
وطبعا مش انا بس
دا الصحابه نفسهم كانو كده
بس منحنى الهبوط عند الصحابه كان حاجه تانيه
لكن عندى منحنى الهبوط ساعات بينزل لدرجه تخوف
بس والله الواحد بيجتهد
والثبات دى حاجه من عند ربنا
اللهم ارزقنا الثبات يا رب العالمين


اكتر عيب فيك ونفسك تتخلص منه ؟

هو زى ما قلت قبل كده الازدواجيه يعنى حبه فوق وحبه تحت


ايه الحاجة اللى عملتها وندمت انك عملتها قوى ؟
والله هو مش حاجه معينه لو عدينا مش هنخلص
اوقات فى الساعات الى انا فيها تحت بعمل حاجات
ولما ربنا يمن علينا ويهدينا بندم اوى
واستغرب ازاى عملت كده
انا هقولكم حاجه مش ندمان عليها
ممكن نقول حزن عليها
هو احنا من سنتين كنا هنشترى شقه فى العجمى
وكان خلاص الموضوع قاب قوسين
ومش هقولكم التمن لانكم هتفتكرونى بهزر
بس ما حصلش نصيب ولحد دلوقتى حزين عليها
طبعا علشان الشقق فى العجمى نار دلوقتى
وكنت ظبط نفسى وهحول جامعة اسكندريه
وهعيش فى اسكندريه يا سلام فكرتونى والله بالاحلام الحلوة دى

ايه الحاجة اللى لسه معملتهاش وحتموت وتعملها ؟
دى كتير قوى ..نبدأ بالاقرب
طبعا نفسى اتزوج ودى رقم واحد
ونفسى كمان اعيش فى اسكندريه باى طريقه
وكمان نفسى يبقى عندى مكتبه كبيره مليانه كتب

بالنسبه للناحيه العلميه نفسى فى نوبل فى الطب

وبالنسبه للاهم طبعا
حلمى انى اخلص واختم القران
ولى حلم صعب شويه بس دايما بتخيله نفسى اقف امام بالناس فى الحرم
وكفايه دول دلوقتى
اكتر دعاء بتقوله وبتردده دائما؟
سبحان الله وبحمده سبحان الله العظيم ......................

لو عرفت انك هتموت دلوقتى وقالولك اخر حاجة نفسك فيها ايه ؟
طبعا دى حاجه مفيش فيها نقاش هقوم اتوضا واصلى ركعتين

..............
...............
..............
وطبعا التاج ده امرره لكل زوار المدونة
وبالاخص باجوجو او الدكتور رامى سعده